kya qayamat hai gham ki girai
hansna chaha to aankh bhar aai

un ki yaadon ki jalwa-arai
kitni raushan hai sham-e-tanhai

marhaba ai junun ki ruswai
un ke honton pe bhi hansi aai

kis ki aamad ki hai khabar yarab
dil ki dhadkan bani hai shahnai

koi jada na koi manzil hai
zindagi kis maqam par aai

lab pe mohar-e-sukut hai lekin
mil gai hai nazar ko goyai

ab 'mubarak' ki zindagi kya hai
un ki yaad aur kunj-e-tanhai