kya ye dekhen ki koi aur tamasha kya hai
hum ko khud apne alawa nazar aata kya hai

baz dariyaon ke manzar bhi ajab hote hain
aadmi sochta rah jae ki sahra kya hai

wo to achchha hai ki hum hi khas-o-khashak nahin
warna in tez hawaon ka bharosa kya hai

bujh gae hain jo diye phir se jalaen ki nahin
koi batlao hamein rang hawa ka kya hai

ho mulaqat aur ehsas-e-mulaqat na ho
tera milna jo yahi hai to bichhadna kya hai

dasht ke dhup ne hum ko ye bataya 'khawar'
apne ghar ke dar-o-diwar ka saya kya hai