kyon kaha pas tere aaina-e-dil na rahe kya ye khwahish hai koi tera muqabil na rahe talib-e-dard ko matlub hai saman-e-tapish nashtar-e-gham rahe pahlu mein agar dil na rahe un ki ye zid hai nirali ki mere sine mein dil-e-warafta rahe aarzu-e-dil na rahe hath bismil ne badhaya hai lipat jaane ko ki kafan ban ke rahe daman-e-qatil na rahe rahraw-e-rah-e-mohabbat ko hidayat ye hai jada-paimai rahe hasrat-e-manzil na rahe khana-e-dil mein utarne ka ye matlab thahra mehman ban ke rahe khanjar-e-qatil na rahe qatl-e-ushshaq se qatil ka ye matlab to nahin ghayat-e-ishq-o-wafa uqda-e-mushkil na rahe de ke jaan is liye leta hun sukun-e-khatir daimi ban ke rahe daulat-e-ajil na rahe kyon khafa hote ho diwanon ki khwahish ye hai naghma-e-ishq bane shor-e-salasil na rahe nazr-e-gham is liye ki jaan-e-hazin 'bedil' ne us ki gardan pe kahin minnat-e-qatil na rahe