kyunkar rakhun aziz na tir-e-nazar ko main
rakhta hun dost lazzat-e-dard-e-jigar ko main

aata hai ye khayal ki wo bad-guman na ho
kya zakhm-e-dil dikhaun bhala chaara-gar ko main

hasti mein to pata na chala kya hun kaun hun
jata hun ab adam mein khud apni khabar ko main

dil lut gaya mera na hui kuchh khabar mujhe
batlaun kis zaban se nigah ke asar ko main

ghaalib nahin chalun jo har ek tez-ro ke sath
pahchanta hun apne har ek rahbar ko main

meri tarah hai ye bhi koi dam ki mehman
kyunkar na roun dekh ke sham-e-sahar ko main