lab pe surkhi ki jagah jo muskurahat mal rahe hain
hasraton ka bojh shanon par utha kar chal rahe hain

zindagi ki daud mein pichhe na rah jaen kisi se
khauf-o-khwahish ke ye paikar nind mein bhi chal rahe hain

dil mein khema-zan andhero kitni jaldi mein hai suraj
jism tak jage nahin hain aur sae dhal rahe hain

mere qisse mein achanak jugnuon ka zikr aaya
aasman par mere hisse ke sitare jal rahe hain

rakh hote ja rahe hain mah-o-sal-e-zindagani
jagmaga uththa jahan hum sath pal do pal rahe hain

mail-e-sajda ghulami bhul ja khu-e-salami
aaj wo baadal kahan saya-fagan jo kal rahe hain