labon se kuchh na kaha muddaa jata bhi diya
wo meri baat pe chupke se muskura bhi diya

hawa ki zad mein mujhe chhod bhi diya us ne
aur ek charagh meri ruh mein jala bhi diya

gae dinon ke hawale se mat milo mujh se
wo waqia to bahut din hue bhula bhi diya

wo shakhs jis ke sabab thokaren milin aksar
usi ne mujh ko sanbhalne ka hausla bhi diya

use yaqin tha ki main phir use pukarunga
mujhe guman tha ki main ne use bhula bhi diya