ladta hai mushkil se par mushkil-kusha hota nahin
aadmi insan hota hai khuda hota nahin

qasr-e-irfan mein rasai pate hain arbab-e-dil
har bashar ke waste dar us ka wa hota nahin

chashma-sar-e-nur mein umr-e-abad ki kar talash
chah-e-tariki mein ab aab-e-baqa hota nahin

is haqiqat ko na samjhenge ye khwahan-e-bahisht
kasa-e-daryuza har dast-e-dua hota nahin

har-nafas se mil nahin sakti hai be-jaanon ko jaan
hath har insan ka dast-e-shifa hota nahin

hai falak par mamba-e-anwar tanha aaftab
har sitara charkh par zulmat-ruba hota nahin

zist ke sahil-nashin ye bhi hai ek shakl-e-sarab
halqa-e-girdab-e-dariya naqsh-e-pa hota nahin

karta hai koshish to apni si har insan ta-ba-umr
haq to ye hai zindagi ka haq ada hota nahin

asl fidya sirf ehsas-e-nadamat hai 'wali'
sim-o-zar ya sar kisi ka khun-baha hota nahin