lafz-o-mani ke samundar ka safar hain kuchh log
yar is daur mein bhi ahl-e-nazar hain kuchh log

ye haqiqat hai ki bachchon ki zarurat ke liye
surat-e-silsila-e-gard-e-safar hain kuchh log

hum ne to un se kabhi haq ke siwa kuchh na suna
jurm kya un ka hai kyun shahr-badar hain kuchh log

nur chehre pe to baaton mein mahak hoti hai
chand ka aks hain khushbu ka nagar hain kuchh log

kitne pagal hain ki rajat ko taraqqi samjhe
aasmanon ki taraf mahw-e-safar hain kuchh log