lafzon mein kaisa rang-e-maani dikhai de
mere qalam mein aaj rawani dikhai de

jaise ho sath-e-khwab pe ek be-sutun makan
aalam tamam dosto fani dikhai de

ye dagh dagh apna dil-e-gham nasib tha
yaro nigar-khana-e-mani dikhai de

tum talkh zindagi ke haqaeq se be-khabar
tum ko hayat kyun na suhani dikhai de

wo munjamid hai barf ki manind ai 'shamim'
baaton mein jis ki shoala-bayani dikhai de