lafzon mein un ka naqsh-e-kaf-e-pa dikhai de
nat-e-nabi kahun to madina dikhai de

har dam ho jis ko rahmat-e-alam tera khayal
tufan mein bhi us ko jazira dikhai de

nat-e-nabi ke sath main padhti rahun darud
mujh ko yahi najat ka rasta dikhai de

de meri aankh ko bhi basarat mere khuda
jo shakhs un ka ho wahi un ka dikhai de

sari nahin ye husn-e-mohammad ki raushni
suraj to un ka naqsh-e-kaf-e-pa dikhai de

dariya pe chal ke jaungi arz-e-hijaz tak
mujh ko to paniyon pe bhi rasta dikhai de

phir waqt ho gaya hai azan-e-bilal ka
sahra-e-zindagi mujhe sona dikhae de

sochun tamam din dar-e-aqdas ko main 'qamar'
aate hi nind gumbad-e-khazra dikhai de