laga ke dil koi kuchh pal amir rahta hai
phir ek umr wo gham mein asir rahta hai

kyun hath dil se lagate ho bar bar apna
kya dil mein ab bhi koi be-nazir rahta hai

teri zaban pe qanaat ki baat thik nahin
tere badan pe libas-e-harir rahta hai

yaqin aa gaya in mehrban hawaon se
usi gali mein mera dast-gir rahta hai

tere firaq ka gham wo hai ki dilase ko
ta-subh baam pe mah-e-munir rahta hai

phir ahl-e-ishq ki takhliq hoti hai pahle
junun ki aag mein barson khamir rahta hai