lahu mein dube sitam-rasida figar chehre
kitab jaise khule hue be-shumar chehre

rahin-e-dauran giran-baha suraten hamari
hamare jismon ki zinaten mustaar chehre

hazar chehra kitab aankhon ke ru-ba-ru hai
magar sar-e-rah bhi jo mil jaen chaar chaar chehre

koi mata-e-aziz az jaan chhini hai sab se
jidhar bhi dekhun hain ru-ba-ru sogwar chehre

usi se hai aashkar sara hunar hamara
hamare chehre nahin hue aashkar chehre

bhala kise aasman-e-gardish talashti hai
kahan hain wo khush-numaiyan pur-bahaar chehre