lakh harbe sahi har waza ke shaitan ke pas
dhaal iman ki maujud ho insan ke pas

mulk samjho use pamal baja hai ek din
ab to bas ek yahi daulat hai musalman ke pas

lagte hi tir tumhaara gai yun jaan nikal
baith kar jati ghadi do ghadi mehman ke pas

aadamiyat hi to buniyaad hai har khubi ki
ho na ye bhi to dhara kya hai phir insan ke pas

sohbat yar hai ai dil tujhe ghar baithe nasib
phir tera kaam hai kya hajib-e-darban ke pas

khwahishen nafs ki karte to ho puri lekin
is se behtar nahin aala koi shaitan ke pas

hum ne dil bhar ke kuchh is tarah nikale arman
ki phatakta nahin dil ja ke ab arman ke pas

mat samajhna inhen kam-maya ghani hain ye log
kanz-e-makhfi hai har ek sahib-e-iman ke pas

jubba-sai ki bhi kuchh hogi tumhin ko ummid
galiyan khate ho ja ja ke darban ke pas