lala-o-gul mein bikhar jaenge hum
kaun kahta hai ki mar jaenge hum

din isi fikr mein kata hum ne
raat aai to kidhar jaenge hum

aur ho jae andhera gahra
zindagi aur nikhar jaenge hum

aur barham ho nizam-e-hasti
dil ye kahta hai sanwar jaenge hum

muntazir hai koi kanton se pare
panw kat jaen magar jaenge hum

dekh len hum ko zamane wale
sang-o-ahan mein utar jaenge hum

jagmagate hue aiwanon se
aaina le ke guzar jaenge hum

mit bhi jaenge to manind-e-ghubar
shah-rahon pe bikhar jaenge hum

'nur' jaulan hai samand-e-wahshat
aaj ta-hadd-e-nazar jaenge hum