lambi khamoshi ki sazish ko harae koi
meri aawaz mein aawaz milae koi

main bhi ud sakta hun aakash ko chhu sakta hun
mera soya hua ehsas jagae koi

koi to hoga mujhe dhundne wala yaro
mera gumnam pata sab ko batae koi

aisa lagta ki sab bhul gae hain mujh ko
mere darwaze pe aawaz lagae koi

har taraf sirf sarab aur sarab aur sarab
kab tak aankhon se bhala pyas bujhae koi

sach hai main ne hi khamoshi ki guzarish ki thi
ab meri gum-shuda aawaz to lautae koi

jis ko sun kar mere darwaze pe lag jae hujum
is tarah ki koi afwah udae koi