lamha lamha bikhra hun
sadiyon ka afsana hun

nam hai mera khun lekin
pani se bhi sasta hun

tum ehsas se be-parwa
main ehsas ka mara hun

tum moti ho gauhar ho
main aansu ka qatra hun

hai koi kya mujh jaisa
hangamon mein tanha hun

ishq se rishta hai lekin
aksar us se darta hun

aur mujhe ruswa na kar
waise hi main ruswa hun

tum mujh se begana nahin
main khud se begana hun

tum chhu kar moti kar do
main patthar ka tukda hun