lamhe shumar zat bhi karne nahin diye
pure ye wajibaat bhi karne nahin diye

pesh-e-nazar hain apne muqaddar ki talkhiyan
un se mutalibaat bhi karne nahin diye

badle jo harf lafz ke mani badal gae
mahfuz waqiat bhi karne nahin diye

duniya ke sanehat ne dil ko rula diya
tahrir hadsat bhi karne nahin diye

mausam nae the dil ke kanwal kyun na khul sake
kuchh ahd-e-iltifat bhi karne nahin diye

milti koi kalid hi irfan-e-zat ki
duniya ne tajrabaat bhi karne nahin diye