lati hai subh nur ke paigham roz roz
chhidta hai saz-e-gardish-e-ayyam roz roz

hoti hai roz roz yahan subh jis tarah
hoti isi tarah hai yahan sham roz roz

pane ki bhulne ki tujhe waqt-e-marg tak
karte rahenge koshish-e-nakaam roz roz

aaghaz ikhtitam mein apne wajud ka
dekhenge apni aankh se anjam roz roz

diwar mein sar apna jo marun to gunjega
aata hai zehn mein jo tera nam roz roz

har shab ko aansuon mein nahai hui hai aankh
dil le raha hai khun mein hammam roz roz