le ude phul se khushbu ko faza mahkae
koi kar ke to ye dikhlae magar tum sa kahan

mera khamosh sa lahja bhi bahut bolta hai
bin kahe jaan wo sab jae magar tum sa kahan

meri parwaz pe nazan jo mere sath ude
ho meri taqat-e-parwaz magar tum sa kahan

kho ke tujh ko tere pane mein bahut hain bhatke
gard ahbab bahut hae magar tum sa kahan

meri har bhul pe pyar aae jise bachchon sa
kan khinche mujhe samjhae magar tum sa kahan

zindagi meri thi aur us ko 'jiya' auron ne
mujh ko pal mere jo lautae magar tum sa kahan