leta hai jaan meri to mein sar-ba-dast hun
ai yar main to kushta-e-roz-e-alast hun

ek dam ki zindagi ke liye mat utha mujhe
ai be-khabar main naqsh-e-zamin ki nishast hun

tu mast kar sharab se ai gul-badan mujhe
zalim main teri chashm-e-gulabi se mast hun

dur-az-tariq mujh ko samajhiyo na zahida
gar tu khuda-parast hai main but-parast hun

in sang-dil buton ka gila kya karun 'nazir'
main aap apne shisha-e-dil ki shikast hun