libas us ka alamat ki tarah tha
badan raushan ibarat ki tarah tha

faza saiqal samaat ki tarah thi
sukut us ka amanat ki tarah tha

ada mauj-e-tajassus ki tarah thi
nafas khushbu ki shohrat ki tarah tha

bisat-e-rang thi mutthi mein us ki
qadam us ka bashaarat ki tarah tha

gurezan aankh dawat ki tarah thi
takalluf ek inayat ki tarah tha

khalish bedar nashshe ki tarah thi
ragon mein khun musibat ki tarah tha

tasawwur par hina bikhri hui thi
saman aaghosh-e-khalwat ki tarah tha

hawas andhi zarurat ki tarah thi
wo khud daim mohabbat ki tarah tha

wahi uslub-e-sada sharh-e-dil ka
kisi zinda riwayat ki tarah tha