log jo sahab-e-kirdar hua karte the
bas wahi qabil-e-dastar hua karte the

ye alag baat wo tha daur-e-jahaalat lekin
log an-padh bhi samajhdar hua karte the

samne aa ke nibhate the adawat apni
pith pichhe se kahan war hua karte the

jin qabilon mein yahan aaj diye hain raushan
un qabilon ke to sardar hua karte the

tab adalat se riayat nahin mil pati thin
tab gunahgar gunahgar hua karte the

kya zamana tha mahakti thin wo kyari ghar ki
ghar ke aangan gul-o-gulzar hua karte the

qaid mazhab ki na thi kal ke padosi donon
ek duje ke madad-gar hua karte the

ghar ke sab log nibhate the khushi se jin ko
ghar ke har fard ke kirdar hua karte the