lut jae chaman gul ka tabassum nahin bikta
sau dam hon bulbul ka tarannum nahin bikta

bik jata hai zardar ki ulfat ka tayaqqun
nadar ki chahat ka tawahhum nahin bikta

badhti hai badhe garmi-e-bazar hawas ki
lab bikte hain ai dost tabassum nahin bikta

lab si do zaban khinch do suli pe chadha do
haq-go ka zamane mein takallum nahin bikta

haalat ne kar rakkha ho mahkum bhi 'amir'
khuddar iradon ka tahakkum nahin bikta