lut jati hai har chiz wo tinka ho ki shahtir
han lutne se rah jati hai ek dard ki jagir

ai kash koi kah sake aisa koi ek sher
ek sher jo fil-faur hi ban jata ho taswir

santur pheran qahwa chinar aur shikara
un lafzon se ubhra hai sada zehn mein kashmir

go zehn ko malum hai ab sari haqiqat
ab bhi magar is dil se bandhi chand ki zanjir

ek sada waraq jazb the jis mein kai aansu
ek mere siwa padh na saka koi wo tahrir