lutf duniya to faqat dida-e-namnak mein hai
shaikh sahab ki nazar aaj bhi aflak mein hai

jis ne tamir kiya mujh ko lahu hathon se
khak ho jaun ki wo shakhs bhi ab khak mein hai

mujh ko majbur kiya hai meri majburi ne
aaj bhi meri ana kaghzi poshak mein hai

main jo bimar hua us ne ayaadat ki hai
khu-e-rahmat bhi usi qatil-e-saffak mein hai

ai dil-e-hijr-zada mujh ko na ruswa karna
sharm thodi si abhi lahja-e-bebak mein hai

meri ruswai mein shamil nahin mere chehre
hakim-e-shahr magar aaj bhi is tak mein hai

shahr-e-be-mehr mein zinda tha faqat main 'sahil'
mere ehsas ka qatil meri poshak mein hai