lutne ka kahin khauf kahin marne ka dar hai
dozakh ka ye aangan hai ki duniya-e-bashar hai

kis wahm mein kis haal mein 'iqbaal-umar' hai
allah dikhai nahin deta hai magar hai

aakash pe chamka bhi nahin subh ka tara
aur aap ye kahte hain sahar hai to sahar hai

main apni tabi'at ki nazakat se hun waqif
hansti hui basti mein kahan mera guzar hai

main aur kidhar jaun kahan waqt guzarun
taskin dil-e-zar idhar hai na udhar hai

yun bhi hai ki ta'mir mein shamil hai mera khun
ye shahr mera shahr hai ye ghar mera ghar hai

aise mein to purab ki taraf 'mir' gae the
apne ko sanbhaale hue 'iqbaal-umar' hai