mahaz-e-nur se yaksar hata diye gae hum
misal-e-sham-e-sahari bujha diye gae hum

saron ki fasl pe shayad zakat wajib thi
so is nisab se ab ke ghata diye gae hum

makin-e-khuld hain hum bhi nasab ki nisbat se
zamin pe hasb-e-mashiyyat basa diye gae hum

visal-o-hijr bhi hain faisle nasibon ke
kisi se bichhde kisi se mila diye gae hum

badan ke bojh se ek umr tak nidhaal rahe
zamin ki god mein aakhir sula diye gae hum