mahfil mein ehtiyat se lab apne kholiye
utre jo dil mein baat wahi baat boliye

hum dil-jalon se is ka sabab kuchh na puchhiye
ji chaha muskura diye ji chaha ro liye

dar tha ki soz-e-gham se na shoale bhadak uthen
roe hain is qadar ki gareban bhigo liye

auron se puchhiye na pata la-makan ka
jab dhundhna hi thahra to dil mein tatoliye

isyan ka dagh meri jabin se na mit saka
daman pe jo sharab ke dhabbe the dho liye