mahjur-e-har-anjuman hain hum log
apne mein jila-watan hain hum log

jo sabza-o-barg se ho mahrum
wo shabnam-e-be-kafan hain hum log

ai apni hi khalwaton mein mahbus
shayad teri anjuman hain hum log

khud apne shuur-e-jaan se malbus
be-paikar-o-pairhan hain hum log

ai aalam-e-rang rang takhliq
aazurda jaan-o-tan hain hum log

khud apne wajud mein taqayyud
pa-basta be-rasan hain hum log

har ahd ki shahriyat se mahrum
har shahr mein be-watan hain hum log