mahz dil-lagi ke wo andaz nikle
tere sab ishaare daghabaz nikle

badal dene ka waqt bharte the jo dam
wo sab inqilabi ghadi-saz nikle

wo likhti hai qisse udan-tashtari ke
kisi tarah to shauq-e-parwaz nikle

samajh kar ada hum ghazal kah rahe the
wo ba-qaeda hum se naraaz nikle

mohabbat ki boti yun atki gale mein
raha jae chup hi na aawaz nikle

li shab bhar talashi huzur-e-jigar ki
hawale se un ke kai raaz nikle