main sach ko chhupane ka hunar sikh raha hun
kartab zara mushkil hai magar sikh raha hun

raftar-e-rawani mein kabhi panw na roke
ab kaise nibhani hai thahar sikh raha hun

rishta simat rahe hain badan phail raha hai
dehat se dilli ka safar sikh raha hun

main aastin se un ko to be-ghar na kar saka
kaise utarna hai zahar sikh raha hun

palkon ka bandh tut ke sailab na kar de
kis tarah katte hain nahar sikh raha hun

us ne dikhai aankh to main ne di galiyan
kuchh roz se main taur-e-shahar sikh raha hun

urdu zaban bhi ghar ki zaban hi to hai huzur
itna ajib kya hai agar sikh raha hun