mai-kade se na haram se na sanam-khane se aabru hai tere gham ki mere kashane se zindagi hoti jo gutthi to sulajh bhi jati ye to kuchh aur ulajh jati hai suljhane se maut kis kar-e-numayan pe hai itni nazan shakhsiyat marti nahin shakhs ke mar jaane se aql wale bade mahdud-nazar hote hain masala dil ka hai puchho kisi diwane se raaz tamir ka takhrib mein poshida hai shahr lete hain janam ganw ujad jaane se roz uftada hai kya josh-e-numu ke aage muskuraati hai sahar shab ke siyah-khane se gham se kuchh aur nikhar jata hai insan ka shuur jaise sona ho khara aag mein tap jaane se