mail-e-sohbat-e-aghyar to hum hain tum kaun
kyun bura man gae yar to hum hain tum kaun

kyun rihai ki dua karte ho tum hazrat-e-dil
un ki zulfon mein giraftar to hum hain tum kaun

zahido hashr ke din tum ko khuda kyun bakhshe
wajiburrahm gunahgar to hum hain tum kaun

un ki aankhon se mere sog mein aansu jo gire
zulf boli ki aza-dar to hum hain tum kaun

dil-e-'muztar' ki wafaon se tumhein kya matlab
us ki har chiz ke mukhtar to hum hain tum kaun