main apne ashk mein khud ko bhigo raha hun abhi
khata ko ashk-e-nadamat se dho raha hun abhi

mujhe na chahiye takiya kisi bhi takiye ka
main man ke hath pe sar rakh ke so raha hun abhi

mere mizaj se nafrat rahi hai suraj ko
main ham-kalam jo jugnu se ho raha hun abhi

kisi bhi haal mein sauda zamir ka na karo
main arz-e-nau mein yahi bij bo raha hun abhi

nikal pada hun main khud ko talash karne ko
main apne aap mein khud ko hi kho raha hun abhi

mile jo bar qaza ke to mein utha bhi sakun
tabhi hayat ke har bojh dho raha hun abhi

main barishon mein kabhi dhup ki hararat mein
gharaunda ghaur se dekha to ro raha hun abhi