main ashraf hun to ye andaz kyon hai
meri hasti mujhi par raaz kyon hai

meri manzil hai jab arsh-e-mualla
to phir kotahi-e-parwaz kyon hai

kisi tufan ka hai pesh-khema
ye sara shahr be-awaz kyon hai

mariz-e-ishq ne kya kah diya ye
pareshan itna chaara-saz kyon hai

agar haiwaniyat shamil hai is mein
to phir insaniyat par naz kyon hai

nahin hai jo kisi surat bhi laeq
usi ke waste eazaz kyon hai

chhupana hai agar bebak gham ko
to chehra karb ka ghammaz kyon hai