main be-aman sahi phir bhi ye guman to hai
zamin hai panw tale sar pe aasman to hai

har ek lamha kisi tir ka hai dar lekin
main mutmain hun ki mere paron mein jaan to hai

main is tarah dar-o-diwar se hun begana
ki ghar nahin na sahi ghar ka ek nishan to hai

main apni kashti-e-ummid se nahin mayus
phata purana sahi phir bhi baadban to hai

main apni zat se bahar nikal ke sochta hun
nahin hai rabt magar mera khandan to hai

charagh-e-jaan ka muqaddar ho jo bhi ai 'masum'
hawa ke samne masruf-e-imtihan to hai