main bhi kya karta ki is ko bewafa hona hi tha
zindagi ko ek din mujh se juda hona hi tha

har dua ko mere haq mein bad-dua hona hi tha
ab kisi se kya gila jo kuchh hua hona hi tha

apne be-tabir khwabon ki jalan kis se kahun
is gulabi shahr ko aatish-kada hona hi tha

phir bhi pani ki mujhe qimat ada karni padi
mere lab par tishnagi ka zaiqa hona hi tha

maut ke be-rahm hathon ko bahane ki talash
zindagi ke sath koi hadisa hona hi tha

main bahut hassas hun is mein kisi ka kya qusur
aaina ban kar mujhe sang-ashna hona hi tha

main ne apne sare nakhun kat dale the magar
zakhm ko 'masum' dobara hara hona hi tha