main bil-umum jo honton ko band rakhti hun
mukhalifat mein bhi apni pasand rakhti hun

main jaanti hun ki mujh se na ban padega kuchh
yahi bahut hai dil-e-dard-mand rakhti hun

ye kam nahin ki julus-e-jahan mein rah kar bhi
kisi ki yaad ka parcham buland rakhti hun

tere usul-e-mohabbat se mujh ko shikwa hai
magar main khud ko tera kar-band rakhti hun

agar ye aandhiyan chalti hain mere sar mein 'qamar'
to kyun main ghar ke darichon ko band rakhti hun