main chehre par wasiyyat likh raha hun
pasine se mashaqqat likh raha hun

mili hai aaj fursat likh raha hun
bahut takhir se khat likh raha hun

samay ki dhup se chehre par apne
har ek pal ki aziyyat likh raha hun

kai din ke main faqon se guzar kar
bas ek tukda ghanimat likh raha hun

yahan par kuchh shanasaon se mil kar
ye daur-e-ajnabiyyat likh raha hun

kabhi aa kar milo mujh ajnabi se
main ek lamha qayamat likh raha hun

amir-e-karwan ko ye khabar do
ki manzil ki bashaarat likh raha hun

tera ehsan hai mujh par meri jaan
tere gham ki badaulat likh raha hun

ye mausam ke sabhi rangon mein dhal kar
mizaj-e-adamiyat likh raha hun