main har be-jaan harf-o-lafz ko goya banata hun
ki apne fan se patthar ko bhi aaina banata hun

main insan hun mera rishta 'brahim' aur 'azar' se
kabhi mandir kalisa aur kabhi kaba banata hun

meri fitrat kisi ka bhi taawun le nahin sakti
imarat apne gham-khane ki main tanha banata hun

na jaane kyun adhuri hi mujhe taswir jachti hai
main kaghaz hath mein lekar faqat chehra banata hun

meri khwahish ka koi ghar khuda malum kab hoga
abhi to zehn ke parde pe bas naqsha banata hun

main apne sath rakhta hun sada akhlaq ka paras
isi patthar se mitti chhu ke main sona banata hun