main kaun hun ai ham-nafasan sokhta-jaan hun
ek aag mere dil mein hai jo shoala-fishan hun

laya hai mera shauq mujhe parde se bahar
main warna wahi khalwati-e-raaz-e-nihan hun

jalwa hai mujhi se lab-e-dariya-e-sukhan par
sad-rang meri mauj hai main tab-e-rawan hun

panja hai mera panja-e-khurshid main har subh
main shana-sifat saya-e-ru zulf-e-butan hun

dekha hai mujhe jin ne so diwana hai mera
main bais-e-ashuftagi-e-tab-e-jahan hun

taklif na kar aah mujhe jumbish-e-lab ki
main sad sukhan-aghushta-ba-khun zer-e-zaban hun

hun zard gham-e-taza-nihaalan-e-chaman se
us bagh-e-khizan-dida mein main barg-e-khizan hun

rakhti hai mujhe khwahish-e-dil bas-ki pareshan
darpai na ho is waqt khuda jaane kahan hun

ek wahm nahin besh meri hasti-e-mauhum
us par bhi teri khatir-e-nazuk pe garan hun

khush-bashi-o-tanziya-o-taqaddus the mujhe 'mir'
asbab pade yun ki kai roz se yan hun