main pasti-e-akhlaq-e-bashar dekh raha hun
phir nazm-e-jahan zer-o-zabar dekh raha hun

mazlum ki aahon ka guzar dekh raha hun
go dur bahut bab-e-asar dekh raha hun

maqsad ye shahidan-e-watan ka na tha hargiz
jo aaj shahadat ka samar dekh raha hun

yun to hai har ek jins garan hind mein lekin
arzan hai faqat khun-e-bashar dekh raha hun

ghunchon ke labon par kahan aasar-e-tabassum
har gul ka yahan chaak-e-jigar dekh raha hun

sach hai kisi majbur ki fariyaad ko 'manzar'
dekha nahin jata hai magar dekh raha hun