main wahi dasht hamesha ka tarasne wala
tu magar kaun sa baadal hai barasne wala

sang ban jaane ke aadab sikhae main ne
dil ajab ghuncha-e-nau-ras tha bikasne wala

husn wo tutta nashsha ki mohabbat mange
khun rota hai mere haal pa hansne wala

ranj ye hai ki hunar-mand bahut hain hum bhi
warna wo shola-e-isyan tha jhulasne wala

wo khuda hai to meri ruh mein iqrar kare
kyun pareshan kare dur ka basne wala