main ne ek khwab kya suna dala
bhaiyon ne kuen mein ja dala

yar tum bhi ajab madari ho
sanp rassi ko hai bana dala

aisi chae kabhi na pi main ne
sach bata tu ne is mein kya dala

aankh bhar ke jab us ne dekha to
zard mausam mein dil khula dala

bas wo neki sawab banti hai
dosh-e-dariya jise baha dala

main kahin lapata na hun jaun
tu ne kis khoj mein laga dala

koi samjhega ya nahin 'arshad'
jo sunana tha wo suna dala