makin ko makan se nikaliye
ye nuqta aasman se nikaliye

hamare sath kijiye mukalima
to khud ko darmiyan se nikaliye

khazana rahne dijiye zamin mein
hawas ko dastan se nikaliye

nami jagah bana rahi hai aankh mein
ye tir ab kaman se nikaliye

hamari chup ko sunte jaen ghaur se
hamari baat kan se nikaliye

fazaon mein panap rahi hain sazishen
so baal-o-par bhi dhyan se nikaliye

samay guzar raha hai sans rok kar
sadi ko imtihan se nikaliye

nikal na jae baat dusri taraf
lakir ek zaban se nikaliye

kharab ho rahi hai jins-e-arzu
ye mal ab dukan se nikaliye