man bhi shair ki tarah tan bhi ghazal jaisa hai
ye tere rup ka darpan bhi ghazal jaisa hai

reshmi chudiyan aisi ki ghazal ke misre
ye khanakta hua kangan bhi ghazal jaisa hai

in lachakti hui zulfon mein hai gokul ka saman
ye mahakta hua sawan bhi ghazal jaisa hai

log-giton ki tarah tu bhi rasili hai magar
meri sajni tera sajan bhi ghazal jaisa hai

mere jazbaat ki shokhi bhi ghazal jaisi hai
mere ehsas ka bachpan bhi ghazal jaisa hai

dekh kar tujh ko ghazal kaise na likkhe 'qaisar'
tu ghazal jaisi hai yauwan bhi ghazal jaisa hai