manus ho gae hain sitam peshgi se hum
ab kya karen karam ka taqaza kisi se hum

is se to apne haq mein andhera hi khub tha
be-nur ho gae hain nai raushni se hum

aakhir sar-e-niyaz jhukaen to kis tarah
na-ashna hain rasm-o-rah-e-bandagi se hum

taskin-e-zauq ke liye maghz-e-sukhan hai shart
aasuda-e-ghazal na hue naghmagi se hum

hadd-e-adab mein rah ke 'munawar' ho guftugu
momin ke munh na aaen sukhan-gustari se hum