manzil-e-be-nishan se kya hasil
gum-shuda karwan se kya hasil

tang hoti zamin ka tukda de
wusat-e-asman se kya hasil

kya karen jab ki bujh gain aankhen
raunq-e-be-karan se kya hasil

dad-khwahi ka haq bhi chhin liya
ab ki dar-ul-aman se kya hasil

lams rishton ka paen diwaren
ghar ata kar makan se kya hasil

lut gain jab meri mata-e-hayat
daulat-e-digaran se kya hasil

nazr kar 'zauq' sa fasih sukhan
aisi kaj-maj zaban se kya hasil