manzil-e-dushwar sar karte hue
thak gae hum to safar karte hue

chal rahi hain nafraton ki aandhiyan
pyar ka gulshan khandar karte hue

dekhte hain shahr mein ab khak-o-khun
pattharon ka dil jigar karte hue

uth rahe hain kuchh siyasi log phir
bastiyon mein shor-o-shar karte hue

jashn-e-azadi manaen kab talak
zulm se sarf-e-nazar karte hue

yaad aain kuchh parai sohbaten
aansuon se aankh tar karte hue

maut guzri hai 'sharafat' qalb se
zindagi ko ba-khabar karte hue