manzil ka mohabbat main kahin nam nahin hai
aaghaz hi aaghaz hai anjam nahin hai

sayyaad ye kyun-kar kahun aaram nahin hai
jo kal thi tadap aaj tah-e-dam nahin hai

nazzare se han aur bhi dil hota hai bechain
be aap ke dekhe bhi to aaram nahin hai

aaram sukun mein hai sukun maut mein yani
jine mein to zahir hai ki aaram nahin hai

hai sham to ab subh ka hona hai qayamat
jab subh hui to khabar-e-sham nahin hai

ye dard ye sozish ye tadap aur ye aahen
kis munh se kahun ishq mein aaram nahin hai

ho dil mein mohabbat to ho ehsas-e-mohabbat
fitrat ka ye inam magar aam nahin hai

zulfen rukh-e-pur-nur pe kahti hain bikhar ke
is sham ke baad aur koi sham nahin hai

'raushan' ye mohabbat ki hai duniya hi nirali
mit jaana yahan koi bada kaam nahin hai